Taalarsenaal

Roman

Die driehoekige sirkel - C. Vorster

Waaroor gaan die roman?

"Caro Eksteen keer na 12 jaar terug na haar tuisdorp met net een doel voor oë: vergelding.  Diegene wat haar as jong tiener uitgebuit, gespot en verwerp het, moet weet hoe dit voel om verneder en verloën te word. Na soveel jare eien niemand die onderwyseressie as die oorgewig, naïewe Karolientjie van die verkeerde kant van die dorp nie, en kan sy haar planne in werking stel.

Maar Caro het nie rekening gehou daarmee dat sy emosioneel betrokke gaan raak by die lewens van haar kollegas en leerders nie - die aantreklike Steyn Brink, die oulike verloofde paartjie Betsie en Dirk, die bitsige Salome, en die plomp, ongelukkige tiener Lauren, in wie sy soveel van haar eie hartseer jeug herken.  

Wanneer Caro aanbied om die skool se Graad 11-krieketspan af te rig, raak dinge eers ingewikkeld. Die seuns vind dit moeilik om 'n vroulike afrigter te aanvaar, en wanneer rassisme in die span die kop uitsteek, kom Caro voor haar grootste toets te staan.  Ironies is dit egter juis rassespanning onder die jong spelers wat Caro in staat stel om die tragiese gebeure van haar verlede te konfronteer."  (Bron: Flapteks)

In die intrige van Die Driehoekige Sirkel word die volgende aktuele onderwerpe in die verhaalgebeure verweef, naamlik rassisme, 'n arm-ryk-tema, tiener-drukgroepe, verwerping, ensovoorts.  Die leser sal met die intrige, die omstandighede van die karakter en die milieu waarbinne hulle funksioneer, kan identifiseer.  (p. xx)

Drama

Die Testament - Rhona Peens

Waaroor gaan die radiodrama?

Oom Josef Rousseau is oorlede en sy erfgename is sy enigste oorlewende familielede, sy broerskind Herman Rousseau en sy vrou, Katinka, en hul dogter, Zenobia.  Wyle oom Josef se voorman, Jantjie, en huishoudster Mieta word ook in die testament benoem.  Die voorwaardes in oom Josef se testament gee aanleiding tot die intrige en spanningslyn in hierdie komiese drama.

Die boodskap wat Die Testament wil tuisbring is dat geld mense se lewens kan verwoes.  Oordrewe materialisme of inhaligheid is die gevolg van verkeerde keuses.  Indien mense nie eerbaar kan optree met kleiner bedrae geld wat hulle geërf het en waarvoor hulle nie self gewerk het nie, gaan hulle ook nie groot bedrae geld eerbaar kan hanteer nie.

Die voorwaardes in oom Josef se testament bring mee dat daar heelwat humor in die drama is, maar daar word ook met belangrike onderliggende lewenslesse gewoeker.

Dikwels is dit nie net tasbare skatte wat 'n mens kan erf nie en oom Josef wou op 'n slim manier keer dat nog 'n geslag gebuk gaan onder die straf van suinigheid.  (Bron: Flapteks)

RSG potgooi van Die Testament

Die radiodrama is op 18 Oktober 2018 deur RSG opgevoer en kan as 'n potgooi afgelaai word by: www.rsg.co.za/potgooi. Die lêer is 43734 KB groot.

Erkenning:  Santa Barnard

Laai die lys van voorgeskrewe gedigte vir Graad 10 HT en die gedigte en kortverhale vir Graad 10 EAT vir 2018, hier af.